Як пазбегнуць махлярства па тэлефоне і ў інтэрнэце: А1 правёў анлайн-навучанне для «срэбных» валанцёраў і людзей старэйшага ўзросту
У рамках праекта #яанлайн і агульнанацыянальнай інфармацыйнай кампаніі #Падумайце5секунд, накіраванай на абарону ад махлярства ў інтэрнэце, А1 у партнёрстве з Міністэрствам працы і сацыяльнай абароны і Фондам ААН у галіне народанасельніцтва (ЮНФПА) правёў анлайн-навучанне па кібербяспецы для людзей старэйшага ўзросту. Да адукацыйнай трансляцыі кампаніі далучыліся «срэбныя» валанцёры і наведвальнікі тэрытарыяльных цэнтраў сацыяльнага абслугоўвання насельніцтва з усёй Беларусі. Усе жадаючыя могуць паглядзець запіс эфіру на YouTube-канале А1.
Гэтай восенню А1 запусціў кампанію #Падумайце5секунд, каб праінфармаваць як мага больш людзей аб спосабах абароны сваіх асабістых даных і нагадаць аб тым, як важна не спяшацца выконваць просьбы незнаёмцаў. Самы просты спосаб засцерагчы сябе — проста ўзяць паўзу і падумаць 5 секунд перад тым, як перайсці па незнаёмай спасылцы, перадаць камусьці коды з SMS ці адказаць на падазроны званок з месэнджара.
Кіберзлачынцы пастаянна распрацоўваюць новыя спосабы падману карыстальнікаў. Напярэдадні свят асабліва папулярныя званкі і паведамленні пра фіктыўныя выйгрышы і падарункі, падробленыя аб'явы пра продаж ялінак і навагодніх аздабленняў. Людзі старэйшага ўзросту і людзі з інваліднасцю часцей за ўсё аказваюцца ў зоне рызыкі. Спецыяльна для іх А1 у супрацоўніцтве з Фондам ААН у галіне народанасельніцтва і Міністэрствам працы і сацыяльнай абароны арганізаваў анлайн-навучанне.
Падчас навучання эксперт кампаніі А1 расказаў удзельнікам, чаму важна выконваць меры бяспекі ў інтэрнэце і па тэлефоне, а таксама, навошта зламыснікі прадстаўляюцца супрацоўнікамі буйных кампаній ці дзяржаўных органаў, як іх распазнаць і што рабіць у такіх сітуацыях.
З моманту запуску кампаніі А1 #Падумайце5секунд ужо больш за 1 000 удзельнікаў, уключаючы сацыяльных працаўнікоў, «срэбных» валанцёраў і людзей старэйшага ўзросту, паспяхова прайшлі анлайн-навучанне. У лістападзе яно было праведзена для супрацоўнікаў арганізацый сістэмы сацыяльнага абслугоўвання насельніцтва, якія працуюць з людзьмі старэйшага ўзросту і людзьмі з інваліднасцю і могуць ім дапамагчы разабрацца, як пазбегнуць махлярства пры выкарыстанні свайго смартфона.
Каб важная інфармацыя заўсёды была ў людзей старэйшага ўзросту пад рукой, кампанія A1 у супрацоўніцтве з Фондам ААН у галіне народанасельніцтва і Міністэрствам працы і сацыяльнай абароны распрацавала памятку, якая ўжо даступная для спампоўвання на сайце safety.a1.by. Друкаваныя версіі памяткі можна знайсці ва ўласных крамах A1 і ў тэрытарыяльных цэнтрах сацыяльнага абслугоўвання насельніцтва па ўсёй Беларусі.
А1 ужо некалькі гадоў запар у супрацоўніцтве з Фондам ААН у галіне народанасельніцтва і Міністэрствам працы і сацыяльнай абароны рэалізуе праект #яанлайн, у рамках якога супрацоўнікі кампаніі праводзяць бясплатныя заняткі па лічбавай пісьменнасці ў тэрытарыяльных цэнтрах сацыяльнага абслугоўвання насельніцтва.